في أي وقت تحسي نفسك تدلعي شفايفك مالك زيت الشفايف هذا 💅🏻

شهرته بديت لما Dior طلعوا الزيت حقهم وانشهر مرة وسار صعب يتلاقى .. فكان هذا البديل الرسمي له و مع الوقت يمكن سار أشهر من حق Dior

السؤال المهم .. إيش زيت الشفايف؟ هو عبارة عن تركيبة جاية في الوسط بين مرطب الشفايف والـ Lip Gloss لأنه يرطب ويغذي وفي نفس الوقت يعطي لمعة ولون خفيف حلو بدون ما يكون ثقيل على الشفايف أو يدبق..

يتكون بشكل أساسي من زيوت الجوجوبا والبندق و بذور ثمار الورد .. فيعطي حماية وتغذية وترطيب تحسي فيه مو مجرد طبقة خارجية تلمع والسلام

الحلو فيه إنه ما يسيح ولا يحوس الروج أو يكون طبقة بعد فترة .. إحساسه على الشفايف جدًا جميل وحنون وهذا شيء نادر في المنتجات اللماعية .. والفرشة حقته كأنها مخدة غير عن الفرش اللي متعودين عليها .. عشان كذه أنا ما أستغني عنه ودايما موجود في شنطتي 👌🏼

تقدري تستعمليه بأكثر من طريقة .. لحاله أو مع محدد خفيف عشان يعطيكي لوك ناعم .. أو مع تنت .. أو فوق الروج المات أو العادي عشان يعطي لوك أقوى ✨

يجي منه 7 درجات بس أشوف الفرق في الألوان بسيط ومايبين بشكل واضح إلا على البشرات الفاتحة .. وإذا كنتي راح تستخدميه فوق روج أو تنت غالباً ماراح يبين .. فاعتمدوا في اختيار اللون على الأندرتون حقتكم

في منه نوع إسمه Intense Lip Comfort Oil ألوانه مرة مركزة .. جربوه لو تبغوا مرطب يستعمل لحاله .. لكن خيارات الألوان راح تكون قوية شوية إذا كنتي فاتحة .. وبرضو أحس بسبب قوة اللون إحساسه على الشفايف مو بنفس مستوى نعومة الزيت الشفاف..

متوفر في موقعهم وفي محلهم وفي دبنهامز

إذا جربتيه يهمني أسمع رأيك! 😍