أتوقع أكثر سؤال راح يجيني على هذا البوست .. إيش معنى ريڤيو على هذي الفرشة بالذات من بد كل الفرش؟!

أمانةً لأني أحس إني الوحيدة اللي تعرفها 😌 وبرضو لأنه مافي ولا براند ثاني منزل نفس الفرشة ..

للتوضيح: الـ Kabuki brush هي فرشة تجي بشعر قصير نسبياً وتكون جداً كثيفة وتستخدم للدمج بكل أنواعه .. وعادة تكون دائرية أو مسطحة

الفرشة هذي شكلها غير عن فرش الكابوكي المعتادة .. شكلها هرمي وبحسب موقع Sigma تستخدم لدمج الكونسيلر لكن ما أشوفها تنفع لكذه ..

أنا جربتها لغرض مختلف وبالفعل ضبطت معايا .. لأني ما أفضل أستخدم اسفنجة على بشرتي (لا بيوتي بليندر ولا غيرها) كنت أدور على حل بديل لتثبيت الباودر.. ولقيت الفرشة هذي أفضل خيار وأحسن من الإسفنجة

الإسنفجة مشكلتها تنظيفها صعب ومهما نظفتي فيها يبقى داخل بقايا ميكپ عكس الفرش .. وأنا لأن بشرتي حساسة أدقق كثير في أي شي يقرب منها ..

الحلو فيها إنه شعرها مرة مرة كثيف وقصير فتمسك كمية باودر كبيرة و شكلها الهرمي يخليها سهلة الاستخدام تحت العين وعلى زوايا الأنف والفم .. استخدمها بالطبطبة زي الاسفنجة بالضبط .. وبعدها اشيل الزايد بفرشة باودر عادية

طبعاً فرش Sigma معروفة والكواليتي حقها جيد .. قد جربت فرش من عندهم ما كانت جودتها ممتازة .. لكن هذي تعتبر من الأفضل

إذا تستخدموا باودر أنصحكم فيها بقوة..

موجود في بوتس ووايتس أو المواقع اللي توفر فرش Sigma

إذا جربتيها يهمني أسمع رأيك! 😍