منتجات العناية الكورية عادة تتميز إنها لطيفة على البشرة بس أوقات تكون لطافتها زايدة عن اللزوم لدرجة ما تحسي إنها تسوي شي!

لكن الوضع مختلف مع هذي البادز حقت التقشير .. هي عبارة عن مسحات من القطن مغمورة في تركيبة يدخل فيها حمض اللاكتيك وحمض الجلايكوليك ولها جهة ناعمة وجهة خشنة ..

الجهة الخشنة من المسحة تساعد على إزالة طبقة الخلايا السطحية المتراكمة وأي آثار لمكياج وغيره .. والأحماض تدخل في البشرة بشكل أعمق وتساعد على تنظيف وتفتيح المسام

وهذا الشي المميز فيها .. إنه تركيبتها لطيفة للاستخدام اليومي وفي نفس الوقت تعطي تأثير ممتاز مع الاستعمال المستمر .. وتعتبر من المنتجات اللي تقريباً مالها شبيه في الماركت ..

يجي منها 3 أنواع .. نوع بالـ واين ويشتغل بشكل أساسي كمضاد للأكسدة (النوع المفضل عندي).. ونوع بـ الليمون ويشتغل على صفاء البشرة وتوحيد لونها .. ونوع بـ الشاي الأخضر مضاد للالتهابات ويساعد جدا للبشرات اللي تتهيج بسرعة .. مممكن تستخدمي نوع واحد أو أكثر من نوع على حسب احتياج بشرتك .. لكن لا تستخدمي أكثر من مسحة وحدة في اليوم

أنا استخدمه في روتين الليل بعد ما أنظف بشرتي تماماً وقبل وما أحط كريماتي .. المسحة تجي زي الجيب تدخلي أصابعك فيها و تفركي البشرة بلطف .. واستخدمي الجهة الخشنة أو الناعمة على حسب ما يناسب بشرتك

تجي 30 مسحة في العلبة الوحدة وبرضو يجي منها نوع كل مسحة مغلفة لحال وهذي مفيدة جداً في السفر

موجودة في كثير مواقع بس أنا آخذها دايما من آيهيرب

إذا جربتيها يهمني أسمع رأيك! 😍