في الغالب الماسكارا ما تكون من المنتجات اللي تعتمدي فيها على براند واحد أو رأي واحد أو طريقة استعمال وحدة ..

وأتوقع كل وحدة يكون عندها أكثر من ماسكارا مفضلة لكن كل وحدة لها طريقة ووقت استخدام مختلف

هذي الماسكارا هي الأساس عندي .. واستعملها بالنوع العادي والنوع الووتر بروف ..

أحبها لأنها تكثثثففف الرموش بشكل مو طبيعي وكمان ثبات النوع العادي منها جداً ممتاز .. ما تسيح ولا تتفتت وتفشلك وهذي نقطة مرة مهمة ليا لأني ما أعيش بدون مسكارا إلا لما يكون مزاجي مضروب 🙄

الووتر بروف استعملها في الأوقات اللي جدا مهمة أو لما تكون عيوني تدمع بشكل مستمر من الحساسية .. لأنها مستحيل تطلع من العين بأي شكل من الأشكال .. قبل ما تشتروها لازم تتأكدوا إن عندكم ميكپ ريموڤر خاص للووتر بروف ميكپ عشان ما تتورطوا ..

كمان حلو فيها إنك تقدري تحطي أكثر من طبقة بس لازم تكوني نوعاً ما سريعة وتحطيهم ورى بعض .. وبرضو لازم تكوني منتبهة إنك ما تثقلي مرة لأن الرموش راح تبدأ تتكتل ويصير منظرها بشع ..

والنوع الووتر بروف لأنه صعب يروح ضروري تكون منتبهة إنك ما تغلطي خصوصاً لو كنتي لوك متعوب عليه لأنها بالفعل ما تروح وراح تحوسك عشان تقدري تعدلي بدون ما يخرب الميكپ

عيبها إنها ما تعطي طول للرموش قد الكثافة للأسف .. وهذا يضطرني إني استخدم ماسكارا تطول قبلها لما أبغى رموشي تبين أطول..

موجودة في سيفورا وكل مكان بس ممكن كثير تلاقوها مخلصة لأن الطلب عليها عالي

إذا جربتيها يهمني أسمع رأيك ! 😍