أجهزة دايسون للشعر للأبد مسببة حيرة للبنات إذا كانت بالفعل تستاهل سمعتها..

اللي يعرفني يعرف إني مهووسة فيهم وعندي كل منتجاتهم الخاصة بالشعر حتى المشط حقهم 😆

والسؤال اللي دايما يتكرر عليا .. نشتريها أو لأ؟

ما أقدر أعطي جزاب قاطع .. لكني أشوفه أفضل جهاز من الثلاثة أجهزة حقت دايسون للشعر

فيه 3 درجات حرارة و 3 درجات لقوة المروحة .. وفيه خيار هوا بارد عشان يمسك السشوار بعد ما تخلصي

ميزته الأولى تصميمه .. خفيف تقدري تاخذيه معاكي أي مكان بدون ما ياخذ مساحة كبيرة .. ولأن حجمه صغير فاستخدامه جداً سهل وبسرعة تتعودي عليه .. وطريقة تركيب الملحقات بالمغناطيس تسهل حياتك بشكل كبير ..

الملحقات اللي معاه مفيدة خصوصا الديفيوزر لو كنتي من أصحاب الشعر الكيرلي أو الويڤي ..

وأهم ميزة فيه إنه أبداً ما يحرق الشعر -بناءً على تجربتي- لأن أعلى درجة حرارة فيه أقل من باقي أجهزة السشوار الموجودة في الماركت .. وهذا برضو ممكن يكون عيب لأصحاب الشعر الكيرلي لأن النتيجة ماراح تكون نفس النتيجة اللي تحصلي عليها في باقي الأجهزة اللي حرارتها توصل مليون

وميزة إضافية إنه مو من الأجهزة اللي مركب فيها الفرشة حقتها .. وهذا يعطيكي حرية إنك تستخدمي أي نوع فرشة تناسبك حسب طبيعة شعرك والنتيجة اللي تبغيها

الخلاصة .. نشتريه أو لأ؟

أشوف إنه استثمار ممتاز للشعر .. جودة أكثر من ممتازة (استخدمه من 6 سنين بشكل شبه يومي وكأني مشتريته أمس) وبرضو يعطيكي نتيجة مناسبة للاستخدام اليومي لو كان شعرك كيرلي .. ولو كان شعرك ناعم راح يكون جهاز تعتمدي عليه بشكل يومي وللمناسبات .. بدون ما يحرق أو يضر شعرك

أنا معتمدته للإستعمال اليومي .. أو للسشوار السريع ما قبل الفير عشان شعري ما يتضرر .. لكن ما استعمله لما أبغى شعري يكون في أفضل طلة ..

موجود في موقعهم وسيفورا وكل محلات الالكترونيات ..

إذا جربتيه يهمني أسمع رأيك ! 😍