أتوقع رحلة البحث عن البيرفكت أيلاينر رحلة كلنا عايشينها ومهما لقينا منتج ممتاز لسا عايشين في شك إن أكيد فيه شي أفضل منه بس إحنا ما عرفناه 😅

غالباً ما راح يوصل لنتيجة نهائية .. لأن كل براند آيلانير يتميز بطريقة مختلفة .. لكن أنا شخصياً كل مرة ألاقي نفسي أرجع لـ KVD

راح أبدأ بعيبه الوحيد .. ما يجي منه إلا لونين بني وأسود فقط .. الأسود غامق ولونه حلو .. لكن لما تجربوا براندات ثانية تكتشفوا إنه مو أغمق سواد في العالم .. يتفوق عليه Huda Beauty و Marc Jacobs (للأسف وقفوه) .. أما اللون البني فيعتبر غامق شوي ومو مرة يعطي الـ Soft Effect اللي المفروض يعطيكي إياه اللون البني

بس بالرغم من كذه يبقى آيلانري المفضل لأن ثباته ما يمزح .. حطيه وعيشي حياتك .. وفي نفس الوقت ياخذ وقت بسيط ومناسب عشان ينشف بشكل نهائي .. وهذا يعطيكي مساحة تعدلي عليه لو غلطتي .. وأنا أشوف هذي أهم نقطة في الآيلانير .. الأنواع اللي تنشف في نفس الثانية تخلي حياتك جحيم لو غلطتي في الرسمة 🥲

وكمان الفورميلا حقته تتحمل إنك تعيدي فوق الرسمه.. ما تتقشر وتحوسك

والفرشة حقته تعتبر من أفضل فرش الأقلام لأنها مستحيل تقطع أو ما ترسم إذا استخدمتي طرفها النحيف وهذا يخليه مريح جداً في الاستعمال ..

المهم إني أحبه من قلب وللأبد ممتنة لصاحبتي اللي عرفتني عليه (هاي أبرار 🤓❤️) .. ولازم كلكم تجربوه 😎

إذا جربتيه يهمني أسمع رأيك ! 😍