هذا الماسك من المنتجات القليلة اللي أقدر أضمنها لكم بكل ثقة ..

ما أتذكر صراحة كيف طحت عليه.. لكنه رجع الحياة لشعري بشكل ما كنت اتوقعه ..

منتج أسترالي عضوي عبارة عن خليط من مجموعة من الزيوت .. وصراحة المفروض يسموه خلطة بس عشانه أسترالي صار اسمه ماسك 😎

يجي منه 3 أنواع يفرقوا عن بعض في خلطة الزيوت ،، لكنهم الثلاثة يتكونوا بشكل أساسي من زيت جوز الهند وزيت الزيتون وزيت الخروع وزيت الأرغان ..

جربت الثلاث أنواع ما أحس فيه فرق بينهم إلا في الريحة .. وأظن فيه نوع لونه أفتح من الباقيين (يناسب الشعر المصبوغ أكثر بس مو متأكدة من المعلومة) .. النوع الأزرق الفاتح ريحة الكوكنت فيه أقوى .. إذا كنتي ناوية تجربيه خذي واحد من كل نوع عشان تقرري إيش الريحة الأنسب لك ..

هو يجي بقوام مشابه لقوم زيت جوز الهند لما يكون جامد عشان كذه مصنف كماسك ،، لكن مع أجوائنا اللطيفة راح تلاقيه سائل طول الوقت 🥵

طريقة استعماله .. ببساطة ساعتين على شعرك وتغسليه .. أنا استخدمه كل جمعة بس أخليه أو بالأحرى انشغل ويجلس أكثر من ساعتين .. وأحب أغطيه بطاقية بلاستيك ومرات ألف فوقها منشفة لزيادة مستوى الرطوبة في الشعر .. خلال 3 شهور بديت أشوف نتيجة خرافية على شعري (السر الأعظم لشعر صحي هو الاستمرارية 😉) .. النفشة راحت والكيرليات اترتبت وشعري صار صحي بشكل أقرب للخيال ..

وهذا اللي خلاني ما أوقفه صراحة.. واستخدمه حتى مع الصبغة مع إن المخاطرة عالية .. لكن ما صرت استخدمه بشكل أسبوعي

أمانة جربت أسوي خلطة الزيوت نفسها في البيت بس مدري كيف طلعت حوسة وريحتها لا تطاق 😶‍🌫️ .. فرجعت لهم وأنا ما أشوف الدرب 🤣

يمكن راح تحسي سعره شوي أوڤر على منتج عضوي عبارة عن خلطة زيوت.. لكن النتيجة وسهولة استخدامه أشوفها تخليه يستاهل سعره..

إذا فكرتي تطلبي منهم اطلبي الشامبو حقهم .. صحيح ريحته من رهيبة لكنه حرفيا أفضل شامبو مرطب جربته في حياتي ويتفوق على كل البراندات المعروفة والغير معروفة

متوفر في موقعهم ويطول نوعا ما لين ما يوصل ..

إذا جربتيه يهمني أسمع رأيك ! 😍