ما أعرف كنت عايشة بدونه 🤷🏻‍♀️

قبل ما أتكلم عنه بصراحة ما أحس إنه راح يفيدك إذا مسوية فيلر واضح لشفايفك .. Sorry

أما إذا كانت شفايفك طبيعية أو مسوية فيلر خفيف راح تلاحظي الفرق لما تستعمليه

هو عبارة عن قلوس يرطب ويعطي إمتلاء للشفايف .. يتكون بشكل أساسي من زيت الكرز وحمض الهاليرونيك

يجي منه 31 لون في دول العالم المحظوظة.. بس عندنا متوفر فقط 10 ألوان 😶

جربت قبله منتجات بنفس الفكرة من ماركات ثانية لكن هذا اتفوق عليهم لأن نتيجته واضحة بدون ما يحرق الشفايف.. وكل ما حطيته قبل بوقت أطول كل ما كانت نتيجته أفضل..

في البداية جربته لأني أحب الأرواج المات .. فلازم الشفايف ما يكون فيها خطوط عشان تبين بشكل حلو مع الروج المات.. ومع الوقت صرت ما استغني عنه و استخدمه بأكثر من طريقة على حسب المزاج ..

استخدامي العادي له يكون قبل النوم .. كذه تحصلي منه على أفضل نتيجة وفي الصباح راح تلاحظي الفرق على شفايفك ..

وبرضو استخدمه أوقات فوق الروج أو التينت لو أبغى اللوك يكون قلوسي .. لو كنت طالعة الصباح أحطه لحاله أو مع محدد خفيف .. يعطيكي منظر صحي.. وبرضو استخدمه أول ما أبدء أهيء بشرتي للميكب عشان يعطي مفعوله .. وأمسحه قبل ما أحط الروج ..

الدرجة اللي أنا معتمدتها 001 Pink ولكن اكتشفت مؤخراً درجة 012 Rosewood تعطي توريد لطيف وطبيعي للشفايف فتعتبر خيار أفضل لو تبغي تستخدميه لحاله .. لكنها طبعاً Sold Out من كل بقاع الأرض 😶

متوفر في بوتيكاتهم و موقعهم و دبنهامز وسيفورا ..

إذا جربتيه يهمني أسمع رأيك ! 😍