لما كتبت الريڤيو عن Goof Proof Brow Pencil جاني كم تعليق إنه يطيح الشعر .. أنا شخصيا ما مرت عليا هذي المشكلة .. بس شفت إني لازم أكتب عن المنتج المتربع على العرش في عالم الحواجب 😎

باودر الحواجب هو أفضل شيء تستخدميه لو تبغي حواجب متعبية بس بمنظر طبيعي ومريح للعين ..

ليش أحبها؟ لأنها تجي بـ 11 درجة مختلف تغطي كل الدرجات والأندرتون الدافية والباردة .. وكل درجة يجي فيها لونين وهذا يعطيكي خيارات أوسع .. واللون حقها قوي وما يهر على العين ..

وعشان تضمني أفضل نتيجة ممكنة منها لازم تنتبهي لـ 3 نقاط:

1- اختيارك للون لازم يكون صحيح .. وإحنا عندنا مشكلة إن بنات سيفورا في أغلب الأحوال ما عندهم خبرة كافية في اختيار اللون المناسب للحواجب -وهذا ينطبق على جميع الماركات- فتحتاجي تاخذي وقتك .. اختاري لون قريب للون حواجبك الطبيعي أو أفتح درجة فقط .. لا تختاري أغمق بأي شكل من الأشكال .. ولازم تراعي إن الدرجة تتناسب مع لون شعرك

2- لازم حواجبك تكون مهيأة بشكل صحيح .. تكون جافة أو تحطي عليها باودر عشان يمتص أي دهون .. كذه تضمني الرسمة واللون يطلعوا مضبوطين

3- استعملي فرشة مشطوفي نحيفة مرة عشان تحددي الحواجب من تحت وتعبي الفراغات .. وفرشة زي حق المسكرة عشان توزعي الباودر على الحواجب بشكل متساوي

تحتاج شوية تدريب .. لكن نتيجتها تستاهل 👌🏼

تلاقوها في سيفورا .. وتقدروا تطلبوها من موقعهم

إذا جربتيها يهمني أسمع رأيك ! 😍