أعتقد أنا اليوم راح أدخل منطقة خطرة لأن موضوع جل الحواجب ينقسم لفريقين لا ثالث لهما ،، بينيفت vs نيكس ⚡️

الآراء اتضاربت وأنا نفسي بدلت كثير بين الإثنين على حسب المود والإعلان وتأثير البيئة المحيطة 🌚 بس في النهاية بينيفت فاز من وجهة نظري ..

هذا الجل يتميز بأنه خفيف وشفاف تماماً .. وهذا اللي يخليه يتفوق على نيكس

قوامه الخفيف يعطيكي فرصة أطول إنك ترتبي الحاجب بالشكل اللي تبغيه قبل ما يبدأ ينشف ويصير صعب التحكم فيه .. وكمان مايصير ثقيل على الحاجب ويخلي الشعرات تنزل على تحت ..

ولأنه شفاف تماماً ما يبين إنك حاطة شي على حواجبك ولا يخليها باهتة لما ينشف ..

وهذي الشغلتين اللي تخلي الجل حق نيكس ما يناسبني .. يطول على ما ينشف وتنزل الحواجب ما تقدر تثبت على فوق بسبب ثقل قوامه .. وكمان مرات كثيرة أحسه يخلي حواجبي باهتة لأن لونه من الأساس مو شفاف ..

جل بينيفت البعض يشتكي إنه ما يثبت .. أنا لما أحطه أحس كأني حاطة سبراي على حواجبي .. مستحيل تتحرك بأي شكل .. فأتوقع السر في طريقة الأبليكيشن .. طريقتي إني بعد ما أحطه أستمر أمشط حواجبي إلين يقرب ينشف .. مجرد ما أحس إنه بدأ يلزق أوقف تمشيط وبعدها الحواجب تثبت تماماً

طبعاً أنا هذي تجربتي وممكن مو الكل يتفق مع رأيي .. لكن التجارب تختلف باختلاف نوع وسمك الشعر وطبيعة نمو الحاجب .. عشان كذه هذي المرة يهمني كثير أسمع رأيك لأنك أكيد مجربة واحد منهم على الأقل 😉