إذا كنتي لسا تنظفي بشرتك بمزيل الميكب المعتاد .. صراحة مدري إيش أقولك .. بس الله يعين بشرتك 😓

من أول مرة جربت فيها أشيل مكياجي بـ cleansing oil اتغيرت حياتي تماما.. معد صرت اتقبل إني امسح مكياجي بمزيل مكياج وقطنة أو مناديل تنظيف المكياج .. لأنها قاسية على البشرة .. المكياج عادة مكون من زيوت، وأفضل طريقة لإزالة الزيت هي تذويبها بزيت!

طيب إيش الفرق بين زيوت التنظيف ومزيلات المكياج العادية؟
زيوت التنظيف عادة تتكون من مواد مغذية ومرطبة للبشرة و non-abbrassive بعكس المزيلات اللي عادة تكون stripping للبشرة ولا تعطي أي ترطيب أبداً.. بالإضافة لأنه المزيلات نستخدمها بقطن أو مناديل وهذا برضو يضيف عنصر خشونة على البشرة .. بينما الزيت نستخدمه باليد وهذا ألطف شي ممكن نستخدمه على بشرتنا.. وطبعا خيار عدم استخدام القطن أو المناديل يعتبر صديق للبيئة أكثر..

مزيل المكياج هذا عبارة عن زيت مكون من خلاصة الليمون وزهرة دوار الشمس وزيت المورينغا .. يساعد على تهدية البشرة ويشيل كل آثار الميكب حتى لو كان ووتر بروف

طريقته.. تحطي كمية مناسبة على حسب كمية الميكب اللي حاطته وتفركيه إلين تشوفي كل الميكب ذاب .. بعدها تحطي عليه موية وراح تلاقيه يتحول إلى قوام حليبي .. ولما تتأكدي إن بشرتك نظفت تماما تغسليه بالموية

أنا جربت تقريبا أغلب المنظفات الزيتية الموجودة .. وكل مرة أرجع لهذا لأنه الأفضل في إزالة الميكب الووتر بروف.. الباقيين أغلبهم ما ينظفوه بشكل كامل .. الشي الوحيد اللي يعيبه إن ريحته شوي غريبة … لكنه ما يترك أي أثر ميكب على البشرة ولا تحسي بشرتك مدهنة بعد ما تغسليه..

حقيقى أنصح فيه من قلب .. لأنه بمجرد ما تصيروا تنظفوا بشرتكم بالزيت .. راح تحسوا بالفرق في نظافة البشرة عن مزيل الميكب العادي .. وفي نفس الوقت راح تحسوا قد إيش الزيت رقيق على البشرة مقارنة بالقطنة والوايبس

متوفر في وايتس وسيفورا وأحيانا في النهدي .. وأكيد في محل وموقع كلارينس ..

إذا جربتيه يهمني أسمع رأيك ! 😍